EgYpT
أولا أحب أقولكم أنكم وحشتوني موووت بجد
غبت عنكم فترة كدة بسبب أنتقالي لبيت تاني بس الحمد لله أخيرا رجعت وأتمنى تكونوا فاكريني وأتمنى كمان أنكم تكونوا بخير دائما
بما أني بعدت عن النت فترة .. فا الفترة دي فكرت كتيير جداا
فكرت في حياتي أولا وفي حاجات كتير جدااا منها مصر !!
هبدأ كلامي عن مصر عشان هو دة الأهم فكرت في حياتنا كمصريين ككجزء من العالم كله مش على المستوى العربي ... طبعا في ناس غير العرب واخدين عننا فكرة مش لذيذة خالص وكل ما أكلم أي حد من برة الوطن العربي بتأكد من الموضوع دة
زي مثلا في واحدة من كندا كانت فاكرة أننا عايشين في بيوت من طين ! والجمل طبعا وسيلة الأنتقال عندنا و أننا عايشين في حروب !! و و ... الخ دي واحدة من ناس كتير عندها الفكرة دي عن مصر وفي كل مرة بتسأل الأسئلة كنت بستغرب أكتر عشان فيه بجد أسئلة متتقلش !!
يعني من الآخر الصورة بتاعتنا برة أننا كلنا كدة زي البدو كدة عايشين في الصحراء ودة مش كلام مني وخلاص بس دة بيبان في الأفلام بتاعتهم كمان ولو عايزين أسامي الأفلام دي هقولهالكم ... !!
هو طبعا للأسف لو قارنا التطور التكنولوجي بتاعنا والتطور بتاع الدول الخارجية زي دول أوروبا وأمريكا وبعض دول الشرق الأقصى هنلاقي أننا بدو فعلا !!
يمكن طريقة تفكيرنا تختلف 180 درجة عن طريقة تفكير غير العرب وكالعادة بدل ما نستفاد من خبرتهم ونقلدهم بس طبعا في الحاجات الأيجابية اللي نقدر نستفاد منها في حياتنا ونفتح لنفسنا آفاق جديدة لتفكرينا للأسف العكس هو اللي هو بيحصل .. طبعا مش قصدي أن حياتهم ناخدها منهج لحياتنا عشان في حاجات كتير لا تتماشى مع ثقافتنا وديننا طبعا بس أنا بقول على طريقة التفكير وأحترام القوانين و و و ... الخ وبرده مش قصدي أن كل الأجانب بيحترموا القوانين بس أنا بكلم كلام عام مش أكتر
بنسمع كتير ناس بتنادي بعدم تقليد الأجانب .. نيجي مثلا لأتفه حاجة وهو موضوع الجيل بنسمع كتييير جدا اللي بيقولوا أن الشباب بيقلدوا الأجانب في موضوع جيل الشعر .. مش عارف أصلا المفروض متكلمش في الموضوع دة لتفاهته بس على العموم فيها ايه لما الشباب يحطوا جيل في شعرهم !! ومين قال أصلا أن الأجانب بيحطوا جيل في شعرهم .. قليل جدا منهم اللي بيحطوه !! للأسف بنسيب كل حاجة وبنهتم بأتفه الحاجات !! أذا كان الشباب فاكر أنه كدة عمل تطور حتى ولو كان تافه فا مادام أنه مش تطور مؤذي ومش حرام فا يا ريت نبطل طريقة تفكيرنا المتأخرة شوية دي .. أتمنى أني أكون وصلتلكم اللي أنا عايزه عشان هو مش موضوع جيل بس طبعا والا مكنتش كتبت اللي فات دة عشان الجيل مش هو موضوعنا طبعا !!!
دة حتى أحنا لسة لغاية دلوقتي رابطين نفسنا بالفراعنة ! كل ما نعمل موضوع عن مصر أو تعريف ليها نجيب كل صور الأهرامات وشوية آثار كدة وجنبها كام جمل على كام واحد من البدو بيشتغلوا هناك وخلاص وأي واحد مصري يطلع برة نقول عليه دة الفرعون المصري أو بنسمع أسم الفرعون الصغير كتير !! مش عارف أمتى هنطلع من موضوع الفراعنة خلاص يا جماعة الفراعنة دول مش هنستفاد منهم في حاجة دلوقتي في حياتنا غير طبعا في السياحة أكيد .. بس خلاص بقى ... ما علينا
هما حاجتين بس حطنها في دماغنا مصر ذكرت في القرآن الكريم وطبعا دي حاجة نفخر بيها ونبقى سعداء جداااااااا بيها و تاني حاجة أن أجدادنا الفراعنة !!
طاب وبعدين خلينا بقى فخورين بالحاجتين دول وخلاص وطبعا هتقولوا حرب أكتوبر و و و ... هقول دي كانت زمان وراح زمنها خلاص أحنا في سنة 2007 !!
طبعا جميل أننا نبقى عندنا تاريخ عظيم نفتخر بيه بس أنه يكون لينا ماضي بلا حاضر أو مستقبل !! دي حاجة المفروض بجد نفكر فيها مليون مرة قبل ما نفتخر بماضينا !!
أظرف حاجة كمان أننا عندنا مبررات لكا حاجة سهل أننا لما نغلط نلوم غيرنا أو حتى نقول دي بلد متفتحش النفس على حاجة فا عادي أو حتى نقول العيب في الحكومة أو نلوم أي حاجة زي كدة في رمضان لما بنسمع جملة يا عم الواحد صايم ومش ناقص تحس أن الواحد بيتعذب وهو صايم بس هو بيبقى المبرر للعصبية أو أي حاجة عشان سهل جدا الواحد يرمي مبررات ... طبعا أنا مبقولش أن البيئة المحيطة وكل حاجة ملهاش تأثير علينا في حياتنا بالعكس ليها تأثير كبير بس برده ربنا أدانا عقل عشان نفكر بيه واللي عايز يوصل لحاجة أكييد أن شاء الله هيوصلها دة لو عنده عقل بيفكر ! دة طبعا بجانب النية والعزيمة و و ... الخ
دلوقتي زي ما كلنا عارفيين في فجوة كبيرة بينا وبين الدول الأجنبية في التقدم مع أننا كنا سابقينهم بس لكل مجتهد نصيب !! يا ترى هنقدر نحصلهم ؟ يا ترى الفجوة دي هنقدر نقلص مساحتها ؟ الأجابة على السؤال دة صعبة جدا عشان لو فضلنا بنظامنا دة وطريقة تفكرينا يبقى عوضنا على الله !!
طاب خلينا في حاجة تانية ... موضوع حياتنا وأفعالنا وصفاتنا
من خلال تعاملاتنا مع الناس أكييد بنقابل ناس بمختلف المراحل العمرية وكمان بمختلف الأنواع والأجناس .. الخ المفروض اللي يحصل أن الواحد يعامل اللي أكبر منه بكل أحترام وتقدير .. والأصغر بعطف وحنية .. وأكيد بيختلف طريقة التعامل بأختلاف النوع بمعنى طريقة معاملة ولد وبنت أو ولد وولد أو العكس طبعا مش محتاج برده أتكلم في الطريقة عشان كلنا عارفين الطريقة الصحيحة بس في منا مش عايزين يستخدموها .. مش عارف ليه بجد بس دة اللي بيحصل ... بالذات في التعامل ما بين ولد وبنت متهيألي مافيش حد بيتعامل بالمبادئ المعروفة واللي المفروض نتخذها في التعامل .. واللي أبسطها مبدأ
" Ladies First "
بجد أنا بعتبره أبسط مبدأ من مبادئ التعامل مع البنات يعني كفاية الأبتسامة أو حتى كلمة الشكر اللي هتحصل عليها لو مشيت بالمبدأ دة !! وأكيد أنت هتحس بسعادة مع دة أو على الأقل دة اللي أنا بحسه " دة للأولاد طبعا مش البنات " !!! أما بقى تعامل البنت مع الولد العكس يعني مش عارف في بنات كتير بحس أنهم عشان يبانوا بشخصية قوية بيبقوا زي الولاد في تعاملهم بس يعني دة طبعا الأقلية في البنات اللي بيحصل معاهم دة !! نغير الموضوع بقى !!
ايه اللي هيحصل لو كل واحد كدة سأل اللي يعرفهم على صفاته السيئة وحاول يغيرها وميزعلش من الصراحة عشان يقدر يغير نفسه فعلا ؟! ... عشان مفيش حد حيقول أنا عارف أن عندي صفات مش كويسة وهي " كذا , كذا , كذا .... لأنك مش عايز الصفة دي تبقى فيك فا عمرك ما هتعترف أنها فيك أما غيرك أكيد هيبقى أكتر واحد يكون عارف صفاتك الكويسة والعكس تخيلوا كدة كل واحد فينا جاب ورقة وقلم وسأل صحابه أو أي حد من اللي يعرفوه كويس مثلا على صفاته الوحشة وكتبها في الورقة دي ويحاول كدة يفكر فيها ويصلح من نفسه .. في ناس هتستغرب من الطريقة بس أنا بقول أنها مجرد محاولة لتحسين حياتنا
ممكن كمان تقولوا علية مجنون بس عادي عادي :D
كل اللي نفسي فيه بجد أننا نعيش في هدوء كل واحد يبقى حاسس بالتاني وبيحب التاني مش هقول عشان ميحصلش مشاكل بس بقول كدة عشان نقدر نحل مشاكلنا بسرعة ومتخدش وقت بحيث أننا نهيأ نفسنا للتفكير السليم بهدوء في طرق لتطوير أنفسنا
لما نبقى كلنا ناس متحضرين متطورين !! أكييد هنفتخر بنفسنا أحسن ما نفتخر بالفراعنة !!
نصيحة كدة على الماشي .. كل واحد يقعد مع نفسه ويفكر كدة في مسار حياته لو عجبك مسار حياتك يبقى تمام بس طوره على قد ما تقدر ولو مش عاجبك يبقى تاخد قرارات وتبقى قدها وتنفذها ... في حاجة دايما هتخليك أحسن وهي المحاولة للوصول للكمال ... " المحاولة " لأن الكمال لله سبحانه وتعالى بس لو طول حياتك قعدت تحاول أنك توصل للكمال متهيألي حياتك هتبقى أحسن بكتير
وكمان عندي نصيحة للي بيحب يساعد الناس وأنا بقولها لنفسي كمان لما تيجي تساعد حد بدل ما تساعده بطريقة مباشرة بمعنى أنه تكون الفائدة اللي هيحصل عليها هي النتيجة النهائية من الطلب أو بمعنى تاني ...
" بدل متيديله السمكة أديلوا الصنارة وعلمه الصيد عشان يجيب بنفسه سمك مش سمكة "
بكدة هيتفتح قدامه أبواب تانية يقدر يساعد نفسه بعد كدة وهيساعد غيره كمان ...... الخ
بمعنى أني حعلم واحد صاحبي حاجة من البداية فا ممكن واحد يطلب منه نفس الحاجة أو حتى لو قريبة منها فا هيعلمه اللي علمتهوله وصاحبه هيعلملها لصاحبه وكدة ... الخ
في حاجة كمان بس زي ما شفنا في أفلام أجنبية كتيرة أتكلموا على المستقبل زي سنة 2300 وغيرها وكدة طبعا بغض النظر عن الفلام نفسها وما تحتويها بس زي ما شفنا دوول ناس ليهم نظرة بعيدة مستقبلية غيرنا خالص أننا برده بنحاول نرجع بالمستقبل بس للماضي مفيش أي مستقبل بنبصله أو بنحاول نحضرله أي حاجة نظتم عايشين اليوم بيومه !!!
طبعا مش هكلم عن الأخلاق واللباقة والطريقة المثلى للحياة والأتيكيت و و و .. الخ
عشان كل واحد بيحددها بنفسه مش هقدر أغير تفكير أنسان بس هيبقى ليهم موضوع تاني عشان ليهم كلام كتير جدا عندي
وفي نهاية الموضوع أتمنى أني قدرت أوصلكم كلامة بطريقة بسيطة وطبعا لو مختلف معايا في كلامي أنا مستنى ردك
" الأختلاف في الرأي لا يفسد في الود قضية "
بالعكس الآراء هتفتحلي مواضيع تانية هقدر أكلم فيها وأكييد أنا كمان هستفاد من كدة
وكمان أنا بحضر موضوع عن مصر هيبقى بكذا لغة ان شاء الله
فا يا ريت لو عندك صور جميلة لمصر هبقى سعيد لو بعتهالي ويا ريت متبقاش صور لآثار مصر بس :D
في مصر أماكن راقية وجميلة هتبقى أن شاء الله لذيذة بجانب الآثار !!
HaVe a GreaT LiFe
URs :
ThE LeGeNd
