■■■■■■■■■■■■■■■■■■■■■■■■■■■■■■■■■■■■■■■■■■■■
الديمقراطية الزائفة والعدالة الغائبة .. والمثل الأعلى دول إستعمارية
■■■■■■■■■■■■■■■■■■■■■■■■■■■■■■■■■■■■■■■■■■■■
لأول مرة في حياتي أبقى مش عارف أكتب مقدمة لموضوع
يمكن عشان أول مرة أكتب موضوع وأنا حاسس إنه مش حيأثر إلا في عدد معين من الناس .. أو زي ما وصلنا في حياتنا إننا بقينا عارفين مين حيبقى موافق على كلامك ومين مش حييقول رأيه حتى عشان إختلاف التفكير أو الإتجاهات اللي ما بينكم
الغريب إننا كنا بنعمل كل حاجة ونقول غرض الحاجة دي تقريب الناس من بعض ومكناش واخدين بالنا إننا بكل حاجة بنعملها بنبعد عن بعض أكتر
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
نيجي نفكر إحنا في الفترة الحالية اللي إحنا فيها دلوقتي وصلنا لإيه ؟
الناس قاعدين ينادوا بالحرية والديمقراطية والمساواة
والمفروض إن المبادئ التلاتة دول بيطبقوا دلوقتي في بلدنا
ممكن حد يقولي حاجة واحدة بتدل على 1% حتى منهم بتحصل دلوقتي ؟
عارفين دة بيفكرني بإيه ؟
بيفكرني بالحرية والديمقراطية والمساواة بتاعة أمريكا وإسرائيل وبريطانيا وفرنسا .. إلخ
عارفين الدول دي عايشين بالإعلام إزاي ؟
الدول اللي ذكرتهم دول يعتبروا " دول إستعمارية ؟ " حد يقدر يقول حاجة غير كدة ؟؟
ما إحنا 24 ساعة قاعدين نسمع أخبار الحروب اللي بتدخل فيها بغرض تحقيق الحريات وحماية ديمقراطية الشعوب العربية واللي بيحصل بالفعل إيه ؟
إبادة شعب وكبت حريات وححط عينات من البلاوي اللي بيعملوها في البلاد العربية زي العراق ودول تانية طبعا في فيديوهات .. ودة للناس اللي لغاية النهاردة مخدوعين بالدعايا الإعلامية للدول دي .. وللناس كمان اللي واخدين الدول دول مثل أعلى في الحرية والديمقراطية
شوفوا كدة الفيديو دة
دي عينة صغيرة للي واقفين في صف أي دولة إستعمارية ضد دولة عربية مهما كانت
نفسي الناس يعرفوا مين العدو الحقيقي ليهم .. ويبطلوا يمشوا ورا شوية دعايا وإعلام فاسد وخلاص
مثال صغير .. يا ترى إتخدعتوا بأوباما أما جه مصر ؟
يمكن يوم الخطاب اللي عملوا في جامعة القاهرة بعد ما مكملتوش وإنتقدته فجأة لقيت الناس جم في صفه كإني أنا عدوهم وهو واحد قريبهم
يمكن بعد الحمد لله بعد الخطاب اللي عمله في لجنة الشئون الأمريكية الإسرائيلية وتأكيده على إن يجب الإعتراف إن القدس هي عاصمة إسرائيل وتخصيص أمريكا لـ 30 بليون دولار لإسرائيل عشان تساعدها في الدفاع عن نفسها ضد الإرهاب .. الناي إبتدوا يعرفوا إن إنتقادي ليه كان فعلا لأسباب ودة فيديو للخطاب للتأكيد
والموقف دة بالظبط اللي حصل أما إنتقد البرادعي ووائل غنيم بعد ما طلع في العاشرة مساءا مع منى الشاذلي .. نفس الموضوع بالظبط معظم الناس فجأة جم في صفهم وبقيت أنا العدو .. التاريخ بيعيد نفسه
عمتا ما علينا .. بتمنى إن الحقيقة تنتشر بسرعة قبل فوات الأوان
ودلوقتي عشان تعرفوا الفرق ما بين أي شعب والشعب المصري شوفوا الفيديو دة
الإعلام المصري تحول من إعلام فاسد ينافق النظام السابق إلى إعلام فاسد ينافق مجموعة من الناس عشان ياكل عيش .. عشان كدة الحقيقة عمركم ما حتلاقوها في أي وسيلة إعلامية .. الحقيقة لو عايزينها فعلا .. دوروا بنفسكم عليها .. إقروا كتير وإسمعوا كلام ناس واثقين فيهم .. متستنوش الحقيقة تتحطلكم في طبع على الغدا عالجاهز .. صدقوني بالطريقة دي مش حتلاقوها أبدا
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
نرجع بقى للي بيحصل في مصر دلوقتي
دايما بنقول الشعب المصري معروف بطيبته وسماحته .. الخ
فــــــين دة يا جماعة ؟ يا جماعة أنا مبقتش شايف طيبة ولا حاجة والله العظيم
أنا شايف غل وحقد وتشفي وإنتقام وكل حاجة سيئة
لو شفنا خبر حد مات وحد مش حبه مع إنه ملوش علاقة بيه حتى ولا عمره أذاه في حياته بلاقي الناس تقول
" أحسن وعقبال الفلان الفلاني "
إيـــــــــــــــــــه يا جماعة
.. طيبة الشعب المصري إيه دي اللي بتتكلموا عنها .. كفايانا شعارات بقى .. كفاية نفاق وكذب .. كل دة حنتحاسب عليه .. دة بالكذب والنفاق دول كافيين لإننا نتشوي في نار جهنم
■■■■■■■■■■■■■■■■■■■■■■■■■■■■■■■■■■■■■■■■■■■■■■■■■■■■■■■■
ويا ترى الشماتة اللي بقت في الناس دي كلها إزاي بالطريقة دي
مش حكتر في الجزئية دي عشان ردي حيبقى بحديث نبينا الكريم صلي الله عليه وسلم
" لا تظهر الشماتة لأخيك .. فيرحمه الله ويبتليك "
مينفعش تفرح في حد وتقول اللهم لا شماتة!!
ما إنت كدة حتبقى شمتان يعني
■■■■■■■■■■■■■■■■■■■■■■■■■■■■■■■■■■■■■■■■■■■■■■■■■■■■■■■■
وديمقراطية ؟
الديمقراطية الجديدة اللي أول وآخد بند فيها
" إنت معانا ولا مع الناس التانيين ؟ "
هي دي الديمقراطية ؟
الديمقراطية إنك " تمثل " إنك بتسمع وتقرا الرأي الآخر من جانب تقضية الواجب عشان الناس يقولوا عليك ديمقراطي وبتحترم الرأي الآخر ؟ وإنت كل اللي بتعملوا إنك بتاخد كلام الرأي الآخر عشان تغيروا وتلبسوا لناس تانيين عشان تطلع أي حد بيقول حرف " مش طبق الأصل " اللي بتقولوا إنسان غبي وملوش حق يتكلم
الديمقراطية إن حق التعبير يبقى محفوظ لمجموعة من الناس معينة والباقي الدولة تعتبرهم شوية كلاب ولازم يسكتوا عشان تحت مسمى الحفاظ على الثورة
الحفاظ على الثورة ولا " الحفاظ على مجموعة معينة من الناس " اللي ركبوا الثورة أو اللي عايزين يبقوا هم اللي ماسكين الثورة .. بما إنهم قاعدين 24 ساعة يقولوا الثورة ملهاش قائد واللي عمل الثورة دة الشعب كله .. يبقى ليه دلوقتي بنشوف إن الثورة بقى ليها قادة كمان فجأة ؟
تيجوا تقولوا مش عايزين نختزل الثورة في أشخاص معينين .. وأول ما نبين حقيقة حد فجأة يبقى إحنا بنهاجم الثورة .. كدة إنتوا اللي بتختزلوا الثورة في أشخاص مش إحنا
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
فكروا الموضوع من وجه نظر جديدة بحاول أوصلها للناس بقالي كتير
نفترض إنك شغال في شركة وواحد زميلك فاسد عمل إنقلاب على رئيس الشركة وإستغل وجود فساد في الشركة دي
والغرض الداخلي كان طمعه في المنصب عشان يسرق هو .. والغرض الخارجي الواضح إنه بيحارب الفساد اللي في الشركة .. يبقى فيه مصلحة واحد مشتركة وهي محاربة الفساد .. بس للأسف إنت بتساعد فساد يمسك سلطة على حساب فساد تاني .. من غير قصد طبعا وبنية صالحة ..
يبقى من وجهة نظرك دي صح ؟ ولا تحارب الفساد الأول والتاني كمان عشان مصلحة شركتك وشغلك ومصلحة الناس اللي شغالين معاك في نفس المكان ؟
يبقى بعد النقطة دي حسألك سؤال وترد على نفسك بيه قبل ما ترد علية بيه
" يا ترى عايز فعلا تحمي نتايج الثورة ؟ "
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
التخوين بدون أدلة لتحقيق المصالح .. مش دة اللي بتعملوا أمريكا وإسرائيل ؟ عشان توقعنا كلنا في بعض .. وشكلها كدة بتنجح في كل دة
يا ترى عاجبك الإنقسام اللي بقينا فيه دلوقتي ؟ وعايز تساعد الدول الإستعمارية في تفكيكنا كمان وكمان ؟
يا ترى عاجبك الإنقسام اللي بقينا فيه دلوقتي ؟ وعايز تساعد الدول الإستعمارية في تفكيكنا كمان وكمان ؟
الغريب كمان إنكم بتخونوا ناس على حساب ناس تانيين إنتم متعرفوش حاجة عنها
يعني يوم ما واحد يقول كلمة ضد حد وهو مغلطتش فيك أبدا ولا جه جنبك
تقوم مهاجم الشخص اللي إنت متعرفهوش دة عشان الشخص التاني اللي إنت متعرفهوش برضه .. نفسي أفهم دة بيحصل إزاي!!!
والأدهى بقى إن حد يبقى عارفك ويهاجمك عشان شخص ميعرفش عنه أي حــــاجة خالص .. غريبة مش كدة ؟
والغريب كمان إن حد ييجي يقولك وهو مش طايقك .. الأهم إننا إحنا الإتنين بنعمل كدة عشان بنحب بلدنا وقــــال يعني متقبل كلامي وفهمه وإداله أهمية أصلا .. طاب يا سيدي إعمل باللي بتقوله .. مش حنفضل نقضيها في شعارات طول عمرنا
وهنا في سؤال مهم جدا
" يا ترى عايزين الشعب المصري يتحوا إلى شعب منافق لمجموعة معينة من الناس ؟ "
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
نقطة تانية .. يا ترى البلاوي اللي بتحصل في ظل حكومة " عصام شرف " بنتغاضى عنها كلها مع إنها حاجات كبيرة وأما كان أحمد شفيق ماسك الوزارة كنا بنطلع كل صغيرة قبل الكبيرة .. وليه شرف عمال يطبطب قوي كدة على مجموعة معينة بس من الناس وبيساعد في إسكات جزء كبير من الشعب ؟ فاكرين اللي إتعمل مع شفيق .. لو شفنا نفس السيناريو مع شرف بالظبط ؟ نقول إيه هي إنجازات شرف في الفترة دي ؟
نقوم قايلين إلغاء التوقيت الصيفي ونمسك في الحاجات الهايفة وخلاص
للي مفهمش معنى كلامي أقصد .. إمتى حنبقى عادلين فعلا مع كل الناس ونعامل الناس كلهم بعدل ومساواة ؟ مش نطبطب على حد معين ونشوه شخص تاني
ونقول إن موضوع الغرامة بتاعة إبنه ومتصور في التابعي دول جو رخيص للتأثير على الناس
فيها إيه يعني أما نقول كدة .. دة إنتوا اللي علمتونا الكلام دة على فكرة
ولا مش فاكرين ؟؟
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
كنت بكلم مع واحد من صحابي من كام يوم ولقيته بيقولي كلام إستغربتله جدا
قالي إنت إزاي دايما عارفين إنك كنت ضد الحكومة وبتحاول دايما تعرف الناس بالخطط بتاعة الماسونيين وعايز تحارب الفساد وإن كلامي كان دايما كدة على طول .. إزاي دلوقتي إتحولت وبقيت ضد الثورة! .. وإن كل اللي إتحولوا وبقوا منافقين بقوا في صف الثورة وركبوا الموجة .. ومستغرب من موقفي
هو أي حد يقول كلمة عكس الثورة يبقى خلاص خاين وكلب ؟
يا ترى الـ 85 مليون مصري لازم يتبرمجوا عشان يقولوا كلام الثورجية بالحرف
عشان يقدروا يكملوا حياتهم في بلدهم ؟؟
كلام غريب مش كدة ؟ حدي مثال بسيط الأول .. عارفين مرتضى منصور اللي طلع عين أهله في محاربة الحكومة السابقة عشان الفساد اللي فيها واللي إتسجن بسببها 3 مرات في ظلها ؟
تقدروا تقولولي إزاي كان مسجون من كام يوم بعد ما النظام " الفاسد " إتشال ؟
غريبة مش كدة ؟؟
للأسف الثورة عشان فيها مبادئ إتبنتها أنا مكنتش موافق عليها وإنتقدتها الناس طلعوني من كلاب أمن الدولة ومن فلول الحزب الوطني ومن العناصر الأجنبية المندسة وشككوا في كل حاجة بكتبها وفيه ناس كرهوني وإتهزقت وإتشتمت وإتهاجمت وإتقال علية حــــــاجات كتير جدا ويمكن أطرفها واللي صحابي سخسخوا من الضحك أما قروها إني " من المنتفعين من النظام السابق ماديا " نفسي أعرف إزاي دي بالذات .. على فكرة أنا من الناس اللي معندهش مشاكل إنهم يتهاجموا بس يبقى فيه دليل على أي إتهام يتقال .. غريب مش الثورة قامت عشان
" الحرية والعدالة والديمقراطية "
يبقوا فين التلاتة دول في مصر دلوقتي ؟
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
يا ترى فعلا الثوار عايزين الديمقراطية تبقى بالشكل دة ودة اللي نفسهم فيه ؟
نفسهم يبقوا شكل جديد من الحزب الوطني ولكن بشكل دعائي جيد
يا ترى عايزين حرية وعدالة وديمقراطية بالشكل الأجنبي الإستعماري ؟
شكلا دولة ديمقراطية .. مضمونا وحقيقتا دولة مستبدة 100%
والعجيب إن الناس مش قادرين يفهموا ..
إن أي حد ليه طاقة .. متفضلش تستفذ في حد بيشد في شعره 24 ساعة ويوم ما يقلب 180 درجة .. تقوله شفت إنت عامل إزاي .. دة إنت
والسؤال اللي حختم بيه الموضوع هو ..
؟؟
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
بتمنى من صحابي بالذات بجد مش طالب منكم مساعدة في نشر كلامي
على قد ما محتاج منكم تتجنبوا حرقة دمي .. أنا عارف إني أول مرة أنهي موضوع بالكلام دة ومش من عادتي .. بس يا جماعة الخير اللي كنت بعملوا الفترة اللي فاتت للأسف جه على حساب صحتي ودراستي وحاجات كتير .. أقسم بالله دة كله عشانكم وعشان البلد اللي عايشين على أرضها دي ..
فا يا ريت كفاية حرقة دم ..
حكتفي بالقدر دة والموضوع حيبقى ليه أجزاء تانية إن شاء الله
وإحتمال يتعمل تاني على شكل حلقات متعددة في فيديوهات .. ولكن الموضوع محتاج تجهيز لو ربنا كرمني ومعايا صحابي في الموضوع دة ..
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
بالتوفيق للجميع إن شاء الله
لمن يحب أن يتابع المزيد من المواضيع والفيديوهات والحقايق والدخول في مناقشات
منتظركم في الصفحة دي
تحياتي وتقديريمحمد شريف
