هو في ايه ؟

هو في ايه ؟!


محدش يستغرب من عنوان الموضوع .. بس عمتا أنا اللي مستغرب من حاجات كتير
للأسف مش هقدر أتكلم عن كل اللي أنا مستغرب منه أو بالأصح كل اللي أنا مستاء منه


مش عارف أبدأ بايه الصراحة بس هبدأ بموضوع كدة أنا مش لاقيله حل بجد وهو موضوع أن بقينا بنشوف كتير قوي كل محنا ماشيين في مكان مثلا أتنين قاعدين بيشتموا في البلد و و و .. الخ


أنا نفسي أفهم ملها البلد بجد ! .. مبقاش عندنا نخوة أو أنتماء للبلد اللي أحنا عايشين فيها دة بغض النظر عن المشاكل والحاجات اللي بنشوفها وبنقابلها فيها .. بس مش عندنا غيرة كدة على بلدنا .. الصراحة شفت نماذج في بلاد تانية بجد مشرفة .. ناس متقبلش أي كلمة غلط عن بلدها وبجد أحترمت النقطة جي فيهم قوي بغض النظر عن طريقة حياتهم .. بس لقيت فيهم ناس مهما كانت مشاكلهم أو حتى الصعوبات اللي شايفينها بس عندهم غيرة شديدة على بلادهم .. دة اللي كان نفسي أشوفه أو حتى اللي كنت متوقعه أما رجعت لمصر .. بس الصراحة أتصدمت من اللي شفته عشان شفت العكس 180 درجة بس نفسي الشعب المصري يتعدي في الحتة دي من الشعوب الغيورة على بلدها


وكمان في نقطة أن بقى خلاص معظم الشباب عايز يتخرج ويسافر برة البلد عشان يكون نفسه وزي ما بيقولوا " يعمله قرشين " ويبقى يرجع بقى ويبقى تمام وفي بقى اللي بيقولوا نسافر 3 أو 4 سنين كدة ونرجع وال3 سنين دول بيبقوا فجأة 20 سنة أو أكتر .. أحتمال في فرق في السنين في مصر و عن أي بلد تانية " الله أعلم ! " بس ما علينا .. بس اللي عايز يعمل حاجة ممكن يعملها في أي مكان .. ولكل مجتهد نصيب !


لو فكرنا في الموضوع هنلاقي الحياة في الغربة بعيد عن بلدنا وأهلنا جانب سيء عشان مش كل اللي نبصله هي الفلوس ونسيب أي حاجة تانية .. عشان أحنا متهيألي مش عايشين عشان المادة بس .. لو الأنسان عبارة عن كائن حي عايش لتجميع أكبر قدر ممكن من المال كدة تبقى حياة ملهاش أي لازمة .. أصل محدش هياخد معاه حاجة بعد ما يروح لربنا ! .. طبعا مش قصدي أن الفلوس مش مهمة .. مهمة طبعا جدا ولازم كل واحد يشتغل عشان يقدر يصرف على بيته ويعيشهم عيشة محترمة .. بس هي وسيلة وليست غاية .. بس أما تبقى همنا الأول والأخير في الحياة .. أكيد النهاية عمرها مهتبقى لذيذة .. !!


عايز أوضح نقطة كدة أني مش ضد السفر برة .. لا بس لو فرصة كويسة أكييد محدش هيكره يعني !!
أنا كل كلامي على اللي عايزين يسافروا وخلاص .. نظام أما نهج من البلد دي كل حاجة هتبقى تمام .. فاكرين أنهم هينزلوا من الطائرة هيبقوا ملوك!


و في الأول أو الآخر هترجع مصر .. يا هترجع على رجلك يا هترجع في ... !!
عندي كلام كتير قوي قوي قوي في الموضوع دة بس زي ما كنت حابب أن الموضوع يبقى قصير عشان أوضح وجهة نظري بس ..



وربنا معاكم ياللي مسافرين وتيجو بالسلامة ان شاء الله ومع اللي مسافرين كمان وربنا مع الجميع بقى .. وكل واحد ياخد باله من نفسه!