مقال: لكل إخواني يفكر في مصلحة الوطن فوق كل مصلحة أخرى
■■■■■■■■■■■■■■■■■■■■■■■■■■■■■■■■■■■■■■■■■■■■■■■■■
يا ريت نحط كل إختلافاتنا على جنب لغاية ما تخلص قراءة المقالوبعد كدة قول عليا "فلول" أو أي حاجة إنت عايزها وحوافقك عليها
بداية المقال أحب بفيديو نشوفه كلنا وبعد كدة نبدأ
محمد مرسي: أنا عايز الشعب يثور ضدي لو خالفت الدستور والقانون
وكل تعليقي على الفيديو دة .. علم وينفذ .. متنسوش إن دة طلبه هو !
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
تعالى نشوف إيه اللي حصل في مصر من "الإخوان"
جماعة الإخوان تحولت من جماعة قالت إنها مش هاممها مناصب ولا حتنزل مرشح رئاسي ولا عايزين حكومة حتى
لجماعة عايزة تحول كل مناصب الدولة للأخونة .. ومتقولش مبيحصلش عشان أما جينا واجهنا قيادات الإخوان بالكلام دة
تعالوا كدة نشوف الأخونة بتحصل فعلا ولا مجرد مخاوف زي ما بتقولولنا
سعد الحسييني: أخونة الدولة هي الديموقراطية بعينها
عصام العريان: لو أردنا أخونة الدولة كنا أغلقنا قناة "التت"
المشكلة إن "أخونة الدولة" مش حتبقى بقفل قناة التت هي بقفل قناتي "الفراعين ودريم" واللي حيقولي السبب لقفل قنوات دريم البث من خارج مدينة الإنتاج الإعلامي .. يبقى قناة الجزيرة متقفلتش ليه ؟؟!
وبدل ما أجيبلكم فيديوهات كتيرة وأخبار عشان تتأكدوا من موضوع أخونة الدولة حسأل سؤال واحد بس
طالما إن مفيش أخونة .. يبقى ليه كل المناصب تدريجيا والقيادات بقوا إخوان بس ؟
حتقولي دة الطبيعي عشان دة الحزب الحاكم دلوقتي .. وبعد كدة المبرر مـ مبارك كان بيعمل كدة
حقولك .. يبقى زعلتوا من مبارك ليه بقى طالما إن الموضوع عادي ودة الطبيعي ؟؟
وحاجة تانية كمان .. حتيجي تجبلي فيديو لأي قيادي إخواني وهو بيسخر من جملة "أخونة الدولة" ومش عايز تعترف إنها صح يبقى بكل بساطة حجيبلك فيديو لجمال مبارك في مؤتمر وهو بيسخر من موضوع "التوريث"
مفيش "أخونة" ؟؟ ودة المعارضة نشرتها عشان تخوفنا منكم ؟؟
يبقى مكنش فيه توريث ! .. وإنتوا خوفتونا من الموضوع دة عشان تستولوا على الحكم
ولا المطلوب إن آخد كلامكم وخلاص كدة !!
ولو معترف إن الأخونة بتحصل .. يبقى مفيش حاجة إسمها ديموقراطية ولا حرية
لإن التعيين في المناصب مش حيبقى بالكفائات .. لا يبقى بالكوسة .. قصدي بالأخونة
مجرد "مصطلحات" والحقيقة واضحة وضوح الشمس في عز النهار !
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
ندخل في نقطة تانية .. موضوع "الفلول" لقسم الصفوف أكتر وأكتر دلوقتي .. في صفوف المعارضة بشكل واضح بتستخدموا حجة أصل الثورجية حطوا إيدهم في إيد الفلول .. ودي حاجة مش قابلينها .. تعالى نشوف كدة مين اللي حط إيده في إيد الفلول قبل كدة من زمان !!
محمد بديع مرشد الإخوان: مبارك أب لكل المصريين
بكل بساطة تبرير إن الإخوان إتعرضوا لظلم شديد جدا عشان كدة كان لازم يقول الكلام دة على أساس إن مبارك يخف عليهم شوية والكلام دة مش حيدخل دماغ حد لإنكم واخدين في البرلمان القديم 88 مقعد مع الحزب الوطني .. يعني الحياة كانت بتتظبط والحياة جميلة ما بينكم من زمان ولا إيه؟
مش حتكلم بقى عن موضوع إنكم مكنتوش عايزين تنزلوا مرشحين قدام عز وزكريا عزمي في مجلس الشعب أما وصفتوهم برموز الدولة وطبعا كتبتوا فيهم أشعار ساعتها .. يعني من الآخر .. بلاش تجيبوا سيرة حد وتقولوا عليه فلول .. لإنكم "فلول" من زمان جدا !! ولا أقولك .. "على حسب المصلحة" صح ؟
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
نيجي بقى للمخاوف من ترشيح رئيس دولة تحت شعار "ديني" .. تعالى كدة نشوف كلام المرشد .. مش كلامي
محمد بديع: أخشى على مصر من مرشح إسلامي
قلت أجيب كلام المرشد عشان ممكن كلامي متقتنعش بيه .. يا ترى إيه رد على مخاوف المرشد ؟؟
وليه دلوقتي مبقاش فيه مخاوف ؟؟ مع إن مخاوفه دي هي اللي إحنا عايشين فيها دلوقتي
تخيل من "أخشى على مصر من مرشح إسلامي ومش حينزل مرشع رئاسي" .. لـ "أخونة الدولة كلها" .. تناقض غريب جدا
كإنه ضرب مصلحة بلدنا بعرض الحائط .. ؟؟
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
نيجي لنقطة "شرع الله"
نبدأ بسؤال بسيط .. هو مرسي والقيادات الإخوانية "أنبياء منزلين؟؟" .. الإجابة أكيد لا
سؤال تاني بسيط .. هم كل الشعب مسلمين ؟؟ .. لا طبعا
الخلفاء الراشدين أو حتى الأنبياء كانوا كدابين أو خطائين في حق الناس ؟؟ .. لا طبعا
يبقى تعالى كدة نشوف كام حاجة
أولا: حنث اليمين الدستوري ..
مرسي حلف قدام الشعب كله والمحكمة الدستورية بإحترام القانون والدستور والنظام الجمهوري
يا ترى كانت إيه النتيجة ؟؟
الشعب؟؟ قال عليه "سوس" وبيدخلوا حتة مزنوقة .. وبيعملوا حاجات مش مظبوطة !! .. ماشي ما علينا
المحكمة الدستورية؟؟ حيلغيها في الدستور الجديد وحد من صلاحيتها وكل شوية بيعاند معاها زي ما رجع مجلس الشعب وغيرها كتير
القانون؟؟ مش شايفين أي قانون أصلا في البلد .. كل اللي شايفينه واحد بيصحى باخد أوامر إعمل كذا .. من غير الرجوع لدستور أو قانون
الدستور؟؟ مش عارفين أصلا إحنا دلوقتي ماشيين بأنهي دستور .. أو أصلا ماشيين بدستور من الأساس غير "تليفون المرشد"
النظام الجمهوري؟؟ بعد الإعلان الدستوري اللي طلع من مرسي المفروض إننا ماشيين بالنظام الملكي بعد إعلان تأميم جمهورية مصر العربية دولة مساهمة إخوانية
وبعد كل دة إدوله فرصة ؟؟
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
عندنا رئيس دولة جزء من الشعب إنتخبتوه .. بغض النظر عن التزوير وترويع الناخبين والكلام دة كله يعني
كل يوم يطلع علينا شوية قيادات في الحزب يقولوا شوية بيانات وأخبار والرئاسة تنفي وخلاص
وبرضه محدش بيطلع يقول لا مرسي ولا غيره إن مينفعش الناس اللي بيتكلموا بلسانه كل شوية .. ما علينا
المهم إحنا دلوقني بنحاول نفهم مين اللي ماسك مصر
مرسي؟ بديع؟ الشاطر؟ العريان؟ حجازي؟ البلتاجي؟ هنية؟! .. والقائمة الطويلة اللي كلنا عارفينها .. مين اللي حاكم مصر؟
يبقى يا ريت تقولي إنت إنتخبت مين بالظبط؟ عشان نبقى على نفس الخط
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
نرجع للرجالة اللي عايزين يطبقوا شرع الله "على المعارضين" بس .. أما على نفسهم مش مشكلة الله غفور رحيم !
تحبوا أعرض كل بلاويهم ؟؟ ولا الله حليم ستار ؟ بغض النظر عن إن ربنا فضح كل واحد منافق وكاذب منهم
البلكيمي بتاع العملية الجراحية, ونيس بتاع الطريق الزراعي, سكرتير مرسي بتاع الفعل الفاضح في طريق عام, ياسر علي المتحدث باسم الرئاسة اللي إتجوز عرفي, وجدي غنيم بتاع يا أنجاس يا شـ, كملوا إنتوا الباقي عشان والله كل أما بجيب سيرتهم بحس بالعار !! .. مجرد دقون بتشوه الإسلام والباقي مجرد مناصب مدياهم حصانة !! .. وسلملي على "الحكم بـ .. مع وقف التنفيذ" .. والبقية تأتي
يا ترى شرع الله مش الناس دول يتحاكموا؟؟ .. يقام عليهم "الحد" .. ولا شرع الله معناه قفل صحف وقنوات وترويع المعارضين والتكويش على كل مناصب الدولة والكدب والنفاق واللعب على كل الأحبال للوصول للسلطة والتزوير والتهديد .. إلخ !!
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
يا ترى مرسي رئيس لمصر ؟ ولا للإخوان ؟
ليه مبيرحش التحرير أو أي ميدان تاني ؟ .. ليه مش بنلاقيه غير عند أهله وعشيرته بس؟؟
بلاش دي .. مش هو قال مع خيري رمضان أول ما يبقى رئيس حيلبس الجلبية وينزل يصلي الجمعة في الأحياء الفقيرة بدون حراسة؟؟
يا ترى عادي إنه ينزل يصلي الجمعة بـ 9 مليون جنيه مع وجود 12 ألف عسكري وفرقة قناصة وفرق تانية كتير ؟؟
يا ترى عادي أما المرشد يبقى بيحج في بيت الله ويبقى ماشي ومحجزين عليه شباب إخوان للحماية ؟؟
شرع الله ؟ .. مين اللي يتكلم عن شرع الله ؟؟
عجيبة !!
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
في موقع مرسي ميتر .. بتاع مشروع الـ 100 يوم .. مهازل حقيقية
حسيب كل حاجة فيه وحنمسك في نقطتين .. كان متعلم صح جنب
تم حل جميل مشاكل المرور .. تم حل جميع مشاكل الباعة الجائلين
إنت مصدق التطبيل دة ؟؟
حتيجي تقولي طبعا .. فساد 60 سنة .. عايزه يتحل في 100 يوم ؟
حقولك .. هو أنا صاحب فكرة "مشروع الـ 100 يوم" ولا إيه ؟؟
بلاش تبرير وخلاص .. وكل مبرر مصيبة تحصل .. الحادث المتسبب فيه النظام السابق
والنظام الحالي دة إيه لازمته ؟؟ .. ديكور ؟ ولا تقضية واجب ؟؟
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
بعد كدة أول ما تحصل مصيبة في غزة .. على طول يبعت مندوب من مصر والدنيا تتقلب
بس الجنود المصريين يتقتلوا .. أطفال ماتوا .. الشعب داخل في حرب أهلية
لا حياة لمن تنادي .. جنازة ؟ .. مرسي فين ؟ .. بيصلي الجمعة ؟
إيه اللي بيحصل دة ؟
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
ونكتة ديكتاتور مؤقت ؟!
مرسي أول حاجة عملها بعد فوزه بالرئاسة إنه إدا شرعية رسمية لميدان التحرير
يبقى بعد كدة أحب أسألكم
إنتوا مصدقين الجملة دي ؟ .. يعني إيه ديكتاتور مؤقت ؟
يعني نبقى "عبيد" بشكل مؤقت ؟ .. لو قلتلك تعالى أضربك على قفاك 99 قفا بس مش حديلك القفا الـ 100
حتوافق ؟؟ .. لو قلت لأ .. ليه لأ ؟ .. ما هو ضرب قفا مؤقت
دة إنت غريب جدا بجد !
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
فاكر حكومة الفريق شفيق وبعديه شرف وبعد كدة الجنزوري ؟
فاكر حكومة الجنزوري اللي قلتوا لازم تمشي حالا عشان خطواتها بطيئة ؟؟
تخيل مشيت حكومة بمبرر الخطوات البطيئة وحكومة حالية بترجعنا لورا بخطوات سريعة
وبتقولنا إدوها فرصة .. إزاي الكلام دة ؟؟
تخيل حكومة أما سيناء بتضيع مننا وداخلين على حرب أهلية والبلد حتعلن إفلاسها
يطلعوا قرار "قفل المواقع الإباحية" يبقى فرصة إيه اللي بتتكلموا عليها ؟
قتل المتظاهرين في ميدان التحرير .. مبارك لبس القتل
موقعة الجمل .. الفريق شفيق لبس الموضوع فجأة
المجلس العسكري .. كلنا عارفين الإتهامات
عهد مرسي .. قطار قتل أطفال .. جنود بيتقتلوا
الرد: يعني هو قنديل ولا مرسي اللي كانوا سايقين القطر ؟!
هو مبارك اللي كان ماسك سلاح في التحرير ؟ ولا شفيق اللي كان راكب جمل في موقعة الجمل ؟؟
كل حاجة يتقال المبرر .. مـ مبارك كان بيعمل كدة
هو مبارك قدوتكم يعني في الرئاسة ؟ .. شلتوه ليه بقى ؟؟
*▀▀*▀▀*▀▀*▀▀*▀▀*▀▀▀▀*▀▀*▀▀*▀▀*▀▀*▀▀*
مش عارف أقول إيه بجد تاني .. عندي مليون حاجة ممكن أقولهالك بس للأسف المقال حيبقى طويل جدا !
في الآخر أحب أسألك سؤال واحد .. بلدك تفلس وشعبها يدخل في حرب أهلية
و تفضل تبرر للإخوان كل حاجة ؟؟ ولا نحط إيدنا في إيد بعض ونعدل البايظ فيها ونحترم القانون والدستور ونبني دولة القانون ؟؟
وعلى فكرة أنا مسلم وإسمي محمد .. مش كافر ضد الإسلام
مصري زيي زيك .. مش فلول ولا عايز أمسك منصب حتى
فكر شوية .. مصلحة حزب .. ولا مصلحة وطن إسمه مصر ؟
الرد مش منتظره منك ليا .. الإجابة فكر فيها وتعامل على أساسها
بدل ما نيجي اليوم اللي منلاقيش وطن لولادنا وأسرتنا وصحابنا وجيراننا
ونندم في وقت مينفعش فيه الندم
دلوقتي .. مصر في كفة وحزب في كفة
شوف الشعب عايز إيه .. وبلاش تكفير وتخوين .. إنت مش لوحدك في البلد دي
غيرك ليه الحق زيك .. مسلمين ومسحيين وكل الطوائف المختلفة
مصر أولا وأخيرا .. وحفظ الله مصر من كل سوء
■■■■■■■■■■■■■■■■■■■■■■■■■■■■■■■■■■■■■■■■■■■■■■■■■
Mohamed Sherif ..Facebook Blog: http://on.fb.me/WtLD2fTwitter Profile: http://twitter.com/#!/M0hamedSherif
0 comments:
Post a Comment