Love Or Something Else ?!
حبيت المرة دي بقى أتكلم عن موضوع لو قعدت أكتب فيه سنين مش هلحق أخلصه .. ربنا يسهل بقى وأقدر أختصر على قد ما أقدر عشان تقدروا تكملوه لغاية أخره!
الموضوع عن المصاحبة ما بين الولد والبنت .. وطريقة التعامل مع بعض في الحياة عمتا وأثناء فترة المصاحبة دي! مع أني مش بحب الكلمة دي بس مش مشكلة
كتير قبل كدة كانوا بيسألوني ايه الفرق ما بين المصاحبة والصداقة .. مع أنهم كلمتين معناهم واحد .. بس الأختلاف ما بينهم أما نيجي نقول أن الأتنين دول متصاحبين .. مأنتيمين .. فممكن نقول أن الصداقة الناس فاهمة معناها على أساس أنها زي ما بيقولوا كدة هي صداقة ما بين أتنين مش هتؤدي الى أي حاجة مع الوقت ( أرتباط يعني ) .. مش زي الصحوبية اللي بقى مفهومها أنها أرتباط مبداي قبل مثلا الخطوبة وكدة .. مع أني ضد أن يتقال عليها أرتباط .. ممكن أقول شغل مراهقين مثلا ؟!
متهيألي مش محتاج أوصف الفترة دي .. ولو عايزين تقولوا عليها أرتباط فا هقول أنه أرتباط غير رسمي مبكر جداا جداا .. !! دة من وجهة نظري
وطبعا 96% منه مش بينتهي نهاية سعيدة .. مردتش أقول نسبة أعلى من كدة عشان محدش يزعل .. " للي مصاحبين يعني! "
نتكلم شوية بقى عن الجوانب الغلط اللي فيه بغض النظر أن كله غلط أصلا !
زي ما بنشوف ممكن الولد يبقى أهله عارفين عشان مش مشكلة دة ولد ومش هتبقى مشكلة يعني قوي بالنسبة له .. أما البنت فا هي المشكلة عشان الأغلبية العظمى الموضوع دة بيبقى من ورا أهلهم .. ممكن نقول كأنها متجوزة عرفي و مش عايزة حد من أهلها يعرف ليرموها من أقرب بلكونة .. مش كدة برده ولا أنا غلطان ؟!
الشباب بقوا متصاحبين عرفي !!
وطبعا طالما الموضوع محتاج سرية عن الأهل .. يبقى أكييد في حاجة غلط .. ما علينا .. لو قلنا أن الأهل عارفين من الطرفين يعني طبعا الموضوع هيختلف 180 درجة .. ممكن مثلا أنهم متفقين على أن الأرتباط متأجل لغاية ما الأتنين يخلصوا دراسة أو لأي سبب تاني .. فا كدة الموضوع ماشي بالأصول ومتهيألي مش هيبقى مصاحبة! .. مش عارف ليه الكلمة دي بحسها غريبة أما بقولها .. !
وفي حاجة أنا مستغربلها شوية ليه في ولاد يدوا نفسهم الحق في موضوع المصاحبة ولو عرف أن أخته مصاحبة يعمل حريقة .. أشمعنى بجد ؟ أصل طالما أنت مدي نفسك الحق دة .. طاب متخلي أختك تاكل عيش هي كمان .. ولا شايف أن الموضوع غلط بس بتحللوا لنفسك ؟!
أحلى حاجة وأنا بكتب كل دة أني متأكد أن لو حد فكر في الكلام دة فكلامي هيدخل من ودن وهتطلع من الناحية التانية! .. بس هكمل برده !
أما البنت بقى .. فأنا متأكد أن بيبقى عندها حتى ولو نسبة صغيرة من تأنيب الضمير عشان بتعمل حاجة من ورا أهلها .. بس كل واحدة بتطلع بليون عذر عشان تريح ضميرها .. وفيه اللي مكبرين دماغهم عالآخر .. هو في حد غاوي وجع دماغ ؟!
تعالوا نتخيل كدة الأهل عرفوا الموضوع فجأة بأي طريقة .. خارجين مع بعض حد من أهلها شافهم .. بتكلم روميو باشا وحد سمع المكالمة وهو معدي مثلا .. ممكن بأي طريقة يعني .. ايه هيبقى رد فعلك ؟! .. طبعا مش هقولك تعملي ايه يعني .. بس ربنا معاكي بقى .. عشان مفيش أوحش من أن الأهل يعرفوا أن بنتهم بتعمل حاجة من وراهم .. أو أبنهم كمان أكييد .. أصل مهما كانت الأحتياطات أكييد في غلطة هتحصل وهيتعرف .. ولو حد بيحاول يخبي حاجة أكيييد مش هيبقى عايش مرتاح عشان هيبقى متوتر دائما !
وأما عن الولد فا هقوله حاجة واحدة متربطش نفسك من وانت في سن صغير .. مستعجل على ايه يا عم ؟! .. عيش حياتك طبيعي أحسن وأرتبط بطريقة صح أحسن .. بدل ما تتسلى يومين وبعد كدة تدور على واحدة تانية .. وبعد كدة واحدة تالتة .. والحسابة بتحسب ! .. هتفلس في زمن قياسي ما شاء الله .. أحتمال تبقى عايز تاخد خبرة ؟ لو كدة يبقى ربنا يوفقك وابقى هات شوية !
نيجي لنقطة تانية وهي عن الولاد بالذات .. اللي كل اللي عايزينه أنهم يبقى حواليهم بنات ودايبين فيهم بقى وكل واحد عايش في دور دون جوان عصره .. معظم الولاد بداية تعاملهم المباشر مع البنات بيبدأ في الجامعة .. يعني من سن 18 أو 19 سنة يعني في سن اللي بيبقوا ماشيين بدماغهم الناشفة .. " مش كلهم طبعا كدة " .. بس الأغلبية العظمى كدة فا بتبقى مرحلة صعبة جدا .. وكذلك البنات بس خلينا في الولاد الأول .. معظم الولاد بالذات اللي كانوا في مدارس مش مشتركة ييجي يدخل الجامعة أول حاجة بيقولها .. " قشطة بنااااات هييييي .. لازم أظبط بقى! " والفئة دي أنا شفتها كتير قوي فا مش جايب الكلام دة من عندي .. بحس أنهم مشفوش بنات قبل كدة في حياتهم ! طبعا مش قصدي اللي كانوا في مدارس مشتركة يبقى محترمين وماشيين بصورة معتدلة .. فيه منهم ناس في التراوة!
نرجع تاني بقى للي أول مرة يشوفوا بنات دول .. طبعا بيبدأ مشوار التظبيط .. وهو مشوار مفيش أسهل منه .. بس مش كل البنات بيخلوه سهل .. أكييد كلنا شوفنا طرق المعاكسة العقيمة اللي بيستخدمها الولاد .. أنا أتكلمت عن موضوع المعاكسة دة في موضوع قبل كدة فا مش هتكلم عنه تاني .. فيه بقى بنات بيبقوا سهلين جدا في الموضوع دة وفيه البنات اللي بيعملوا فيها تقال بقى والكلام دة .. والحياء ليس له مكان بيننا .. وأنما أخد أول تاكسي وسافر بعيدا الى حيث لا نعرف له طريقا !
" لو حد عرفله طريق يتكلم على رقم ... وهيبقى ليه مكافأة ! "
وطبعا زي ما بيقولوا .. لكل بنت سككة ! والبنات اللي عاملين أنهم بنات عاقلة وبتفكر بدماغها .. دول أول بنات بتروح في داهية .. اللي عايشين بمبدائهم هم بس اللي عايشين صح .. وميتخفش عليهم .. " نوعا ما ! "
نيجي بقى للموضة الجديدة .. اللي بيصاحبوا في فترة الكلية للتسلية .. اللي عايزين يقضوا 4 سنين لذيذة .. وبعد أما الموضوع هيدخل في الجد .. طرف من الطرفين يخلع .. ويبقى عنده مليون مبرر .. دي شفتها كتير برده .
ندخل في نقطة تانية بقى مش هقول مصاحبة بس هقول الحب اللي بيتولد من خلال برامج الشات .. " حب عبر أسلاك شبكة الأنترنت " .. ممكن أقول أنه تعود أو حتى أعجاب .. بس حب , مش عارف متهيألي صعبة شوية ؟! أصل أتنين مستخبيين ورا شاشة وبيكلموا بعض .. كدة ممكن الواحد يلبس شخصية عكس شخصيته خالص .. الميل بعتبره قناع الواحد بيبقى لبسه وهو بيتكلم مع حد .. طبعا في ناس بتبقى على طبيعيتها زي في التعامل المباشر مع غيرهم .. هنقول مثلا أتنين بقالهم سنة مثلا بيكلموا بعض .. الأتنين بيرتاحوا لبعض جدا أما بيتكلموا مع بعض على الميل من غير ما يبقوا أتقابلوا قبل كدة .. اللي بيحصل أن كل واحد فيهم بيرسم في مخيلته صورة للشخص التاني .. ممكن من كدة بيبقى فيه أعجاب .. بس ممكن يكون أعجاب خاطئ .. مش ضروري أن شخص بيعرف يتكلم ورا الشاشة يبقى في التعامل المباشر يبقى نفس النظام .. واحد مثلا اللي يشوفوا وهو بيتكلم على الميل يبقى باين أنه شخص محترم جدا وراجل وقادر على تحمل المسؤولية .. دة معناه أنه في الحياة كدة ؟! أكييد لا .. وكذلك على البنات ممكن تبقى عاملة صورة لنفسها غير الحقيقة اللي هي عليها .. عشان كدة أنا بقول مفيش حاجة أسمها حب عن طريق النت .. غير لو بقى فيه تعامل مباشر يبيبن شخصية الطرفين على الحقيقة مش ورا شاشتين !
وطبعا الكل عارف أن فيه ناس كتير واخدين موضوع النت والشات دة ستارعشان معندهومش الشخصية اللي تخليهم قادرين على التعامل المباشر مع غيرهم فا بيعوضوا الموضوع دة بكدة .. بالمرة هحكيلكم على موضوع كدة حصلي أنا من كام شهر كدة .. واحد أخد صوري اللي حاططها في النت ونسبها لنفسه .. والغريب أنه مش بس كان بيستخدم صوري للتعارف على البنات .. فا اللي يفرس أنه أستعمل أسمي كمان وهو أصلا عنده 15 سنة .. فجأة خلا نفسه 25 سنة ( وعلى فكرة أنا عندي 21 سنة !! ) وطبعا عاش في الدور قوي .. أنه بقى بيحط صوري في المنتديات على أنه هو .. دة معناه ايه ؟! والكلام دة للبنات طبعا أكتر من الولاد .. أن المعلومات اللي هتخدوها من اللي بتتعرفوا عليه أو حتى الصور اللي ممكن تتبعتلكم حتى مش أكييد تبقى دي الحقيقة .. فما بالكم بقى أنكم تبقوا عايشين في وهم كيبر وكمان يبقى الموضوع يبقى حب كمان !! أكييد هيبقى حطيطي نفسك في موقف لا يحسد عليه !
واللي شفته كتير قوي موضوع أتنين بيحبوا بعض عن طريق كلامهم على النت بس والأتنين مش مقتنعين بالموضوع بس بيحاولوا يقنعوا نفسهم بكدة بالعافية .. !!
أما بقى لو أتكلمنا عن طريقة الهزار الغريبة ما بين الولد والبنت فا هنلاقي أن عدد كبير من الولاد بيهزروا مع البنات زي ما بيهزروا مع ولاد صحابهم مثلا ! بس هقول البنات هم اللي غلطانين في الموضوع دة أكتر من الولاد عشان الكل عارف أن البنات بتعمل حواليهم هالة كدة من الحدود اللي بتحدد شكل تعامل الولاد معاهم .. طبعا لو الحدود دي مش موجودة يبقى الأبواب كلها مفتوحة على البحري في التعامل .
في كلام عندي كتير في الموضوع دة بس كفاية كدة المرة دي .. وهعمل جزء تاني للموضوع ان شاء الله في أقرب وقت .. مستني رأيكم كالعادة طبعا ..
بالتوفيق للجميع .. ^.^
